E braghesse

Vanti sera gèrimo zà onti
fin sora i cavei, zugàvimo
a brassae, se rodoeàvimo inte i prai.
Chee pore braghesse gaveva
el coeóre del sussurro.
Scusìe sol cavaeoto,
taconi inte 'l cùeo e sui zanòci.
Stramaciae, cerniera incrucà,
insupae de paltàn.
Dopo sena, i me parava in leto.
Me mama, co a brusca sol masteo,
e russava, pa drito e pa storto,
co' a tòea da lavare.
E strucava, e rasentava,
e sbateva, e intorcoeava, e picava
sui feri del canon dea stua a sugare.
A matina, co se alsàvimo,
e gera bee calde, nete, giustae,
pronte 'ncora pa essare doparae.